Kako je kralj Nikola snižavao poreze nakon teške godine

Osim što je bio ratni vođa, kralj Nikola je morao da vodi računa i o nacionalnoj ekonomiji Crne Gore.

Ostala je zapisana anegdota o tome kako se kralj odnio prema teškoj materijalnoj situaciji mještana, nakon nerodne godine u Drobnjacima:

Novica Cerović krene pravo na Cetinje da se požali knjazu na nerodicu i na naplatu poreza, koja je bila propisana poslije prvog premjera zemljišta. Čim se sastao sa knjazom Nikolom, reći će Novica da su prilike u Drobnjaku vrlo teške, da je nerodna godina, a još, pored toga, došli neki te premjerili one krše i goleti za daciju. Narod nema čim platiti ni tu daciju, pa kada bi sve prodao.

– E, bane, kad ti kažem, onda ću ja narediti da se poreza smanji za jednu trećinu.
– Ne znam ja, gospodaru, šta ti je trećina nego ako može da se oprosti cijela ili polovina.
– E, onda neka se umanji za polovinu – odgovori knjaz Nikola i na tome se svrši.