Keš u Švedskoj nestaje, na potezu centralna banka
Šveđani toliko malo koriste gotovinu da to već brine centralnu banku. Prema istraživanju Riksbank koje prenosi CNBC, 85 odsto građana Švedske ima pristup internet bankarstvu a više ih ima pristup kartičnom plaćanju nego gotovini.
Rapidni nestanak
Odvojeno istraživanje kompanije Capgemini i francuske banke BNP Paribas pokazuje kako se tek dva odsto ukupne vrijednosti platnih transakcija u Švedskoj sastoji od gotovine, a očekuje se da do 2020. ta vrijednost padne na manje od pola odsto. Zaokret Šveđana prema bezgotovinskom palaćanju poprimio je takve razmjere da je Riksbank morala upozoriti na posljedice rapidnog nestanka gotovine.
Guverner Stefan Ingves istaknuo je kako će potpuno bezgotovinsko društvo dovesti do malog broja komercijalnih kompanija odgovornih za cjelokupni platni sistem zemlje. To bi mogao biti problem u slučaju krizne situacije kada gotovina opet “dobija na cijeni”. Drugi je problem što u Švedskoj postoje grupe stanovništva koje imaju slab pristup infrastrukturi za bezgotovinska plaćanja ili ga jednostavno – ne žele.
Odbijanje banaka
Tu prije svega spadaju izbjeglice i penzioneri, ističe za CNBC zamjenica guvernera Cecilia Skingsley. Višestranački parlamentarni odbor trenutno razmatra da li se zakonski može prisiliti banke da pružaju gotovinske transakcije za klijente koji to žele. Naime, sve više švedskih banaka napušta manipulaciju gotovinom zbog slabe potražnje.
Cecilia Skingsley upozorava kako je švedska kruna zakonsko sredstvo plaćanja u zemlji i svako je obavezan prihvatiti je u platnim transakcijama.
“Švedska je definitivno kandidat za prvo bezgotovinsko društvo, ali niko ne zna što nosi budućnost. Kao centralna banka treba da budemo spremni da ispunjavamo naš zadatak u održavanju platnog sistema”, kaže Skingsley, prenosi Poslovni dnevnik.
