Usvojen zakon: Njemačka otvara vrata za radnike s Balkana
Njemačka vlada usvojila je zakon o useljavanju kvalifikovane radne snage koji bi od 2020. trebalo da omogući zapošljavanje i iz zemalja koje nijesu članice EU.
Njemačkoj su potrebni stručni radnici, potrebni su joj radnici iz inostranstva, rekao je nakon sednice kabineta ministar unutarnjih poslova Horst Seehofer (CSU), prenosi Tanjug.
Ministri ekonomije i rada, Petar Altmeier (CDU) i Hubertus Heil (SPD) su pohvalili novi zakon ocjenjujući da će on omogućiti pravedne šanse i jasna pravila u politici useljavanja kvalifikovane radne snage.
Altmeier je rekao kako se radi o istorijskom trenutku u kojem je Njemačka promijenila način razmišljanja kada je u pitanju useljavanje.
“Mi iza sebe ostavljamo ideološku raspravu o useljavanju koja je trajala 30 godina“, rekao je ministar rada aludirajući na dugogodišnje odbijanje političkih faktora u Njemačkoj da proglase državu useljeničkom.
Ministar rada je primijetio da demografske promjene i digitalizacija stavljaju njemačku ekonomiju pred veliki izazov, te da joj već sada nedostaje oko 1,2 miliona stručnih radnika.
On je naglasio da su uslovi za useljavanje i dalje visoki, pa će tako, na primjer, uz stručnu dokvalifikaciju, od presudne važnosti biti i poznavanje njemačkog jezika.
Jedna od najvažnijih novina za buduće useljenike je ukidanje pravila po kojem strani radnik može biti zaposlen jedino ako poslodavac dokaže da za popunjavanje tog radnog mjesta nije pronašao adekvatnog radnika iz Njemačke ili Evropske unije.
Prema novom zakonu gradovi i opštine imaju pravo u budućnosti da reaguju na kretanja na tržistu rada i shodno potrebama mijenjaju kriterijume za zapošljavanje radnika koji ne dolaze iz Evropske unije.
Sukob između stranaka vladajuće socijaldemokratsko-demohriščanske koalicije najviše se vodio o pitanju tretmana osoba kojima je odbijen zahtjev za azil, ali se zbog nemogućnosti protjerivanja već godinama nalaze u Njemačkoj gdje su djelimično uključeni na tržište rada.
Ovim osobama, među kojima je i mnogo stanovnika zapadnog Balkana, će se uz određene uslove, poput poznavanja njemačkog jezika i dobre integracije na tržište rada, omogućiti trajno zapošljavanje na temelju novog zakona o useljavanju stručnjaka.
