Šef američkog Uniteda: Ryanair je jedina uspješna niskotarifna avio-kompanija na svijetu

Ryanair je jedina globalno uspješna niskotarifna avio-kompanija, poručio je izvršni direktor United Airlinesa Skot Kirbi, ističući da je dosljednost u izbjegavanju skupih aerodroma poput Heathrowa i Charles de Gaullea ključ uspjeha. Dok većina LCC prevoznika bilježi gubitke, Ryanair je u 2025. ostvario rekordnih 1,87 milijardi dolara profita i prevezao više od 200 miliona putnika – najviše u istoriji jedne evropske aviokompanije.

Na nedavnoj konferenciji o poslovnim rezultatima, izvršni direktor United Airlinesa, Skot Kirbi, pohvalio je irsku niskotarifnu avio-kompaniju Ryanair kao „jedinu preostalu uspješnu LCC kompaniju u svijetu”, ističući njihovu strategiju izbjegavanja aerodroma sa visokim taksama. Njegova analiza dolazi u trenutku kada niskotarifni prevoznici u SAD-u prolaze kroz velike promjene u operacijama i tarifnoj politici.

U fiskalnoj 2025. godini, Ryanair je ostvario neto profit od čak 1,87 milijardi dolara – više nego dvostruko u odnosu na britanski easyJet i značajno više od svih drugih LCC kompanija širom svijeta. Takođe, Ryanair je postao prva evropska avio-kompanija u istoriji koja je prevezla preko 200 miliona putnika u jednoj godini.

Kirbi: Ryanair je jedina prava LCC kompanija

Tokom izlaganja 17. juna, Kirby je objasnio koliko su visoki operativni troškovi za LCC modele neodrživi kada se leti sa prestižnih aerodroma poput londonskog Heathrowa ili pariskog Charles de Gaullea. Zato je većina niskotarifnih kompanija usmjerena ka jeftinijim, sekundarnim aerodromima – a Ryanair je najbolji primjer takve strategije.

Ryanair je decenijama izbjegavao skupe baze i umjesto toga se fokusirao na aerodrome poput London Stansteda, Lutona i Paris Beauvaisa, gdje su troškovi znatno niži. To omogućava kompaniji da zadrži konkurentne cijene karata.

„Po mom mišljenju, Ryanair je jedina preostala uspješna LCC kompanija na svijetu. I znate zašto? Zato što su ostali dosljedni svojim principima i ne lete sa aerodroma sa visokim troškovima poput Heathrowa ili Charles de Gaullea“, kazao je Kirbi.

Poređenje Ryanaira sa konkurencijom

Iako Ryanair u FY25 nije ostvario veći prihod nego godinu ranije, i dalje je oborio sopstveni rekord po broju prevezenih putnika – preko 200 miliona, uz rast od 9%. Štaviše, zadržao je visok profit iako su prosječne cijene karata pale za 7% u odnosu na prethodnu godinu.

Za poređenje, najveća LCC kompanija u SAD-u – Southwest Airlines – ostvarila je rekordne prihode od 27,6 milijardi dolara u 2024, ali je neto dobit iznosila samo 465 miliona dolara, što je četvrtina Ryanaira. Pogledajmo posljednje dostupne godišnje rezultate najvećih LCC kompanija po veličini flote:

Kod ostalih američkih LCC-ova, Spirit Airlines je najgore prošao – sa gubitkom većim od 1,2 milijarde dolara u 2024. I Allegiant Air je zabilježio minus od 420 miliona, dok je Frontier Airlines iznenađujuće ostvario profit od 85 miliona dolara.

United i Delta u boljoj poziciji

Kirbi smatra da su United i Delta Airlines daleko ispred ostalih američkih konkurenata, zahvaljujući snažnoj bazi klijenata i efikasnim mrežama letova. “Prednosti koje imamo su strukturne, trajne, nepovratne i rastuće – i jednostavno ih je nemoguće kopirati”, rekao je.

Delta je, inače, u prvoj polovini 2025. zabilježila profit od 2,4 milijarde dolara, dok je United ostvario 1,4 milijarde. Nasuprot tome, American Airlines je u prvom kvartalu zabilježio gubitak od gotovo 500 miliona dolara.