Kako ljudi zarađuju od Instagrama?

Sigurno često naiđete na tekst o uspješnom instagram korisniku koji je od svog profila na toj društvenoj mreži napravio biznis i zarađuje prilično dobar novac.

Iako “na prvu loptu” zvuči kao lagan zadatak, to uopšte nije tako. Čovjek mora da ima preduzetnički duh, vjeruje u sebe, gradi svoj prepoznatljiv imidž i najvažnije – bude uporan.

Jer povjerenje se ne stiče tako lako. Osim velikog broja pratilaca koje morate skupiti zahvaljujući interesantnošću i originalnosti, imajte strpljenja, jer uspjeh ne dolazi preko noći.

Dobra stvar je što već ima dosta uspješnih instagram “influensera” pa možete vidjeti kako oni rade, i važnije, kako su počeli. Slobodno im se obratite – iako izgledaju kao nedodirljive zvijezde, naći će se sigurno više njih da vam pomognu sa savjetima za početak. A to su zlata vrijedni savjeti.

Ovo je pet najplaćenijih fitnes zvijezda trenutno na Instagramu

Najbolji crnogorski primjer kako uspjeti na Instagramu je Nataša Gardašević, koja se, može se slobodno reći, proslavila ne samo kod nas, zahvaljujući svojim duhovitim i inteligentnim video klipovima. Njena popularnost prevazilazi crnogorske okvire, pa je za relativno kratko vrijeme prikupila više od 30.000 pratilaca.

To joj je donijelo, ne samo popularnost među korisnicima, već su je primijetile i kompanije. Nataša je nedavno snimila TV spot za lanac prodavnica Uno, gdje je svoj šarm sa instagrama prenijela i na TV ekrane.

Kako je  Nataša uspjela, možda najbolje opisuje u detalje Ivane iz Orbis marketinga u tekstu kojeg u nastavku prenosimo s njenog bloga:

Instagram danas ima veliki domet, broj aktivnih mjesečnih korisnika samo raste i odličan je za izgradnju brenda, činjenica je da ćete na njemu imati najviše uspjeha bavite li se fitnessom, kozmetikom i/ili modom (iako ni kulinarski blog/restoran neće imati problema s popularnošću).

Kažu da ako ne zarađujete na Instagramu onda nešto sigurno radite pogrešno ali ja ne bih bila tako oštra. Ne žele svi zarađivati od društvenih mreža i mnogi ih koriste samo radi zabave. Drugo, uvijek je lakše pričati i dijeliti savjete te učiniti da se ljudi loše osjećaju ako ne uspiju. Kad bih vam rekla da je lagano, a vi ne uspijete zaraditi, mogli biste se osjećati frustrirano i neuspješno jer ste očekivali da je lako. Znači, nešto s vama očito ne valja.

Zato, da razbijemo mit, odmah ću vam reći da nije lagano, da ne zarađuju svi na Instagramu i da ništa ne radite pogrešno čak i ako imate veliku želju za zaradom do koje nikako ne uspijevate doći.

Što vam je potrebno da biste uopće mogli početi razmišljati o zaradi?

Biografija

Popunite Bio na svom profilu. Napišite nešto o sebi, ne bi bilo loše da malo upotrijebite maštu i kreativnost jer znate i sami da ćete na taj način privući više pažnje. Nemojte pisati romane u Bio jer na Instagramu tekst nikoga ne zanima previše, s obzirom da je riječ o vizualnoj društvenoj mreži, slike su u prvom planu.

Budite redovni

Ključ uspjeha se krije u redovnosti. Objavite li danas pet slika na Instagramu pa sljedeće dvije sedmice ni jednu, to je problem. Jednak je problem budete li objavljivali prečesto jer ćete biti malo dosadni. Na svom profilu imam prijatelja koji, bez pretjerivanja, objavi valjda 30 slika dnevno. Sve su lijepe (priroda, cvijeće i njegov Rottweiler) ali monopolizuje cijeli feed.

Savjet bi bio da ne objavljujete više od tri slike dnevno, oprostiće vam svako do pet ako baš morate i svrbe vas prsti da objavite.

Komunicirajte

Nemojte se držati samo sebe i svog profila i čekati da ljudi navale s lajkovima. Pronađite profile koji vam se sviđaju, počnite ih prvi pratiti, komentarišite (iskreno po mogućnosti) i povezujte se. Pokažite da iza vašeg profila stoji prava osoba, a ne robot opsjednut idejom o brzoj i lakoj zaradi ili slavi.

Imajte na umu da je angažman na Instagramu jako važan. Drugim riječima, bolje je imati 600 pratilaca s kojima redovno komunicirate i koji vam ostavljaju komentare nego 60.000 onih koji šute i od kojih jedva skupite 100 lajkova. Brendovi vole pratioce ali još više vole angažman.

Proširite svoje horizonte

Instagram je odlična društvena mreža ali želite li pokazati da ste jako ozbiljni u svom naumu da uspijete, ne bi bilo loše otvoriti blog (pa makar objavljivali samo fotografije s minimalno teksta ukoliko nijeste pisac) ili se fokusirati na još neku društvenu mrežu poput YouTube-a.

Nemojte ni na Instagramu objavljivati samo fotografije. Proširite vidike i poigrajte se s Instagram Stories koje dokazano donose odlične rezultate i privlače gledaoce. Isprobajte i live video, objavite Boomerang. Nema granica odlučite li biti kreativni. Isprobavajte razne metode i sami ćete vidjeti koja vam najbolje odgovara i na šta vaša publika najbolje reaguje.

Zabavite se

Mislim da ne moram posebno napominjati da, bude li vama zabavno, bit će zabavno i vašim pratiteljima. Opustite se, oslobodite maštu i uživajte. Volite li fotografiju i druženje, a ne smeta vam ni pažnja (štaviše, uživate u njoj) imate sav potencijal za uspješno bavljenje Instagramom kao i za potencijalnu zaradu.

Koristite pravilne hashtagove

Hashtag, #, taj mali znak koji toliko puno znači na Instagramu i koji ne smijete propustiti. Što više # to je veća vjerovatnost da će vas neko pronaći. Koristite samo relevantne hashtagove pa ako objavite sliku svoj psa koji spava na krevetu u vašoj sobi, nemojte koristiti hashtag #beach ili #sea jer zavaravate ljude i brzo će vas otkriti.

Nemojte ni pretjerivati s hashtagovima. Iako vam veći broj garantuje veći domet, probajte se suzdržati i ne koristiti više od 12. Previše # može djelovati pomalo spamerski, a želite se svidjeti potencijalnim sponzorima, ne ih otjerati.

Držite se zadate teme

Vaš feed na Instagramu je vaša biograifja. Nemojte pokušavati biti neko drugi jer mislite da ćete na taj način brže doći do svog cilja. Budite samo vi. Nema ništa loše u inspiraciji i uzorima, danas je teško biti potpuno originalan, a malo inspiracije vas samo može pozitivno motivisati i pokrenuti vas u pravom smjeru. Ipak, trudite se zadržati svoju ličnost i pokazati je na Instagramu.

Vodite računa o kvalitetnim fotografijama

Moram li uopšte napominjati da je Instagram vizualna društvena mreža i da mutne, tamne, loše fokusirane i fotografije iz loših uglova nijesu pretjerano popularne? Nadam se da ne. Ne treba vam profesionalna oprema, dovoljna je kamera telefona, malo vježbe, nekoliko filtera i programa/aplikacija za uređivanje fotografija.

Postanite ambasador brenda

Kad imate desetine ili stotine hiljada pratitelja na Instagramu, da ne pričam o milionima, brendovi će vam doći sami od sebe. Problem je što većina korisnika Instagrama, koliko god bili aktivni, nemaju toliko puno pratilaca. Nije problem u vama, nije lako doći do pratilaca na Instagramu i privući pažnju brendova i kompanija s kojima biste željeli da sarađujete.

Prije nego što vam padne na pamet da plaćate lažne pratitelje (što vam ne bih preporučila) probajte postati ambasador nekog brenda. Recimo da imate brend koji jako volite. Objavite sliku na kojoj je nešto vezano uz taj brend i tagujte ili spomenite željeni brend.

Ne morate se fokusirati samo na jedan, može ih biti i više. Važno je samo da ste uporni i redovni. Prođe li sve kako treba, mogao bi taj brend kontaktirati vas, ukoliko se pokaže da im se sviđa ono što radite ili vaše slike dobiju pažnju kakva im odgovara. Mnogi su na Instagramu počeli i uspjeli baš na ovaj način.

Obratite se brendu ili kompaniji

Ne morate čekati da se neko vama javi, javite se nekome prvi. Pronađite ono što vas zanima, napišite mail ili se obratite direktno preko društvenih mreža i pošaljite svoj upit. Nemojte zaboraviti da dodate i link na svoj Instagram profil ili napisati koje je ime vašeg profila.

Napišite zašto mislite da baš vi odgovarate njihovim potrebama, objasnite im šta možete učiniti za njih i koju korist od toga mogu imati. Nemojte previše hvaliti sami sebe i nemojte zaboraviti da većinu kompanija više zanima što vi možete učiniti za njih, a ne oni za vas.

Imate li veliki broj pratilaca (barem 5000) imate veće šanse da uspijete s ovom metodom. Imate li manje pratitelja, ponudite da ćete sarađivati s njima besplatno na probnom roku. Budete li imali uspjeha i ostvarili planirano, dogovorite saradnju.

Uključite se u program

Ne morate sve raditi sami jer na internetu postoje brojne web stranice koje spajaju ambasadore na društvenim mrežama s brendovima. Stranice poput Snapfluence, Brand Snob i Social Glory su upravo takva mjesta na kojima se možete registriovati, ponuditi svoje usluge, a oni će vas spojiti s kompanijama za koje misle da biste im se mogli svidjeti.

Imajte na umu da većina traži da imate barem 5000 pratitelja na Instagramu da biste se uopšte mogli registrovati. Ukoliko vas i prihvate, ništa vam ne garantuje uspjeh jer od svih prijavljenih ambasadora brendovi izaberu samo jedan onih koji im se najviše sviđaju. Ipak, to nije razlog da odustajete.

Prije nego što se prijavite ovakvim agencijama, morate znati da, ukoliko dobijete plaćeni angažman s nekim brendom ove agencije će uzeti svoj dio provizije. To je najveći razlog zbog kojeg mnogi ambasadori odlučuju da sve rade sami.

Skupite barem 5.000 pratilaca

Kompanije (male i velike) najviše zanima koliko imate pratitelja te koliko su oni aktivni i angažovani na vašem profilu. Isto tako, dobro znaju ko ima prave pratitelje, a ko plaćene pa nemojte ni pokušavati varati. Zašto baš 5000? Jer je 5000 obično minimum koji vam je potreban kako biste uopšte mogli početi razmišljati o zarađivanju na Instagramu i saradnji s brendovima.

Neki traže i više od toga, barem 10.000. Neki još i više. Ono što vama treba biti cilj ako želite ostvariti finansijsku korist na Instagramu je 5000. O broju pratilaca zavisi i koliko ćete biti plaćeni za svoje usluge.

Modna blogerka Danielle Bernstein koju na Instagramu možete pronaći pod @weworewhat imenom, ima 1.6 miliona pratitelja i naplaćuje između 5000 i 15.000 dolara za brendirani post na Instagramu.

Koliko zarađuju ostali? Na samim počecima, dobro je kad ostvarite bilo kakvu zaradu tako da nemojte previše očekivati i nadati se da ćete se obogatiti preko noći. Pet hiljada pratilaca bi vam moglo donijeti od 0.5 do 2 dolara po sponzorisanom postu. To je ono što je realno za očekivati iako uvijek postoje izuzeci.

Partnerski (affiliate) marketing

Partnerski marketing je, jednostavno rečeno, promovisanje nekih proizvoda ili usluga, a kompanija s kojom sarađujete vas plati po prodaji. Ova metoda nije nikakva novost ni na blogovima ni društvenim mrežama, iako vam treba veliki broj aktivnih pratitelja koji vas toliko vole i vjeruju vam, da su spremni baciti se u trošak samo zato što ste vi to preporučili.

Partnerski marketing nije rijedak na Instagramu ali je rezultat teže ostvariv jer, kao što znate, link možete staviti samo u Bio. To znači da morate kreirati jako zanimljive postove i podstaći svoje pratitelje da kliknu na link u Bio koji će ih dovesti do web stranice vašeg partnera gdje će potrošiti novce. Zvuči jednostavno ali nije.

Prodajte svoje fotografije

Možda ne želite biti zvijezda Instagrama, volite fotografisati, aktivni ste na Instagramu i željeli biste zaraditi? Prodajte svoje fotografije. Registrujte se na web stranice poput Twenty20 ili FOAP, objavite svoje fotografije koje želite prodati i nikada ne znate, možda i uspijete jer ste talentovani fotograf.

S obzirom da ovakve web stranice imaju zavidnu arhivu nevjerovatnih fotografa, moraćete se istaknuti i investirati u profesionalnu opremu ako je već nemate. Nemojte ni pokušavati objavljivati tuđe fotografije i nadati se zaradi na taj način jer će vas otkriti brže nego što se možete snaći.

Prodajte svoj račun na Instagramu

Imate li veliki broj pratitelja, a dosadio vam je Instagram, svejedno možete zaraditi tako što ćete ponuditi svoj profil na prodaju. Postoje web stanice poput Fame Swap i Viral Accounts na kojima možete prodati svoj račun ako vam više ne treba, a možete kupiti i nečiji tuđi i već uhodan račun.

Vrijeme je za akciju!

Nemojte sjedjeti, čekati i sanjati. Sanjajte ali i djelujte. Ako čitate ovaj tekst zato što biste željeli zaraditi na Instagramu, pokušajte. Kao što sam rekla, nije lako. Ne uspiju svi ali neki ipak uspiju. Nema nikakvih garancija i nema tajnog recepta kako ćete se istaknuti iz mase i ostvariti ono što planirate, to ćete morati smisliti sami.

Ovo su samo smjernice da biste uopšte znali otkuda krenuti i šta vam je potrebno da biste počeli da radite na svojoj ideji. Vodite uvijek računa o kvalitetu, budite redovni, radite ono što volite, postavite ciljeve ali krenite u sve bez velikih očekivanja. Proslavite svaki uspjeh čak i onaj najmanji, jer će vam svaka sitnica pomoći da vas motiviše i natjera vas da idete dalje i onda kad vam se odustaje.

Nećete uspjeti preko noći. Većina uopšte neće uspjeti jer je puno ljudi, milioni, koji bi željeli zaraditi na Instagramu, internetu i raznim drugim društvenim mrežama.

To ipak ne znači da ne trebate probati ako želite. Kakav god rezultat bio, proces će biti jedno zanimljivo iskustvo, puno ćete naučiti i upoznati druge zanimljive ljude. Znate kako se kaže – ko ne proba, taj i ne dobije.

Bonus savjet

Nemojte odustajati. Radite na sebi, trudite se, budite svoji i originalni. Pitajte i možda dobijete. Redovno objavljujte slike, gradite zajednicu, komunicirajte s drugima i odgovarajte na komentare. Nemojte na druge gledati kao na svoju konkurenciju nego kao na priliku da nešto od nekoga naučite i možda se sprijateljite.

Važno je i da ste pozitivni i simpatični jer niko ne voli svadljive i mrzovoljne osobe, a ni one koje se vrijeđaju na svaku kritiku. Budete li postali popularni na Instagramu, velika je mogućnost da ćete naletjeti na ljude koji će vam ostaviti negativan komentar ili na trolove.

Ako je komentar konstruktivan (znaš, bilo bi bolje da si upotrijebila Juno, a ne Lark filter) prihvatite kritiku bez svađanja čak i ako se ne slažete. Ne možete se svima svidjeti. Naletite li na trolove koji ostavljaju negativne komentare jer su ljuti na cijeli svijet, ignorišite ih. Riječ je o nesrećnim osobama kojima je jedino zadovoljstvo u životu da nekoga naljute ili izazovu na svađu. Nijesu vrijedni truda jer je na internetu ipak više pozitivnih ljudi.