Hrvati dižu kredite kako bi išli na četvrtfinalnu utakmicu protiv Rusije

Hrvatska je prošla u četvrtfinale Svjetskog fudbalskog prvenstva u Rusiji i odmah poslije utakmice među hrvatskim navijačima širila se jedna zarazna misao – idemo do kraja! Sve više ljudi vjeruje da ova generacija može nadmašiti uspjeh bronzanih “vatrenih” iz Francuske prije skoro 20 godina, a njihovu vjeru najbolje opisuje želja da ostave sve i odu put Rusije bodriti Modrića i društvo.

U to su se juče uvjerile putničke agencije, piše Jutarnji list. U Elite Travelu odmah su ujutro otvorili stranicu na kojoj su se navijači mogli prijaviti za put u Soči i do juče prijepodne već su primili više od stotinu upita.

“Putnici koji su u Zagrebu sletjeli u sedam ujutro iz Nižnji Novgoroda, odmah su me zvali da pitaju za Soči”, kaže Anes Kovač iz Elite Travela, gdje su već pripremili aranžman za svoje putnike.

Jedan ili dva dana

Cijena paketa po osobi je 6150 kuna (oko 830 eura) uz obaveznu doplatu za avionske naknade od 800 kuna (oko 100 eura). Ovaj aranžman uključuje čarterski let, doručak, ručak i sve potrebne transfere, a povratak je odmah nakon utakmice. Velika je navala i u drugim agencijama. U Ban Toursu rade programe za jednodnevni i dvodnevni paket.

“Poslije utakmice s Danskom nije prošlo ni minut a da nijesmo dobili upit za putovanje u Soči. Cijena bi trebala biti otprilike ista, možda malo viša nego za Nižnji jer je sada špic sezone i Rusija je specifična destinacija za putovanje”, kaže Pavle Marković iz Ban Toursa.

Ipak, postoje dva problema. Prvi je što je potražnja veća nego ponuda. U Elite Travelu kažu da je interes veći nego što imaju čartera.

“Kako je riječ o vikendu, već imamo dogovorene letove s Croatia Airlinesom i Adria Airwaysom koji se ne mogu odgoditi, a i kako igramo s domaćinom, imaćemo manji kontingent ulaznica. Ipak, imaćemo oko tri do pet čartera sa 120 do 150 mjesta”, kaže Anes Kovač iz Elite Travela.

Drugi, puno veći problem su ulaznice. Naime, njih nema više.

“Ulaznice su davno rasprodate, onaj ko je htio kupio ih je odavno. Jedino što se može dogoditi jeste da Fifa oslobodi neki manji kontingent ulaznica, koji bismo onda eventualno mogli kupiti. Ako se to dogodi, objavićemo vijest na našim stranicama”, ističe Tomislav Pacak, portparol Hrvatskog nogometnog saveza.

Karta kao viza

Ulaznice se mogu nabaviti od drugih navijača koji su ih prije kupili, a cijene se kreću od 230 eura do skoro 1.900 eura. U Elite Travelu tvrde da za svoje klijente mogu nabaviti ulaznicu druge kategorije za 230 kuna, a na specijalizovanim stranicama za prodaju karata ta je svota višestruko veća.

Na stranici Viagogo, cijena ulaznice za utakmicu s Rusijom kreće se od 470 eura do 1.900 eura, a na stranici Online Ticket Express koštaju 795 eura, odnosno oko 6.000 kuna. Bez ulaznice navijači neće niti moći ući u Rusiju jer ulaznica vrijedi kao kratkotrajna viza.

Prema informacijama iz banaka, neki su čak dignuli kredit da bi došli do Rusije.

“U posljednjih deset dana primijetili smo značajno povećanje broja zahtjeva za nenamjenske kredite. Klijenti ne kažu za šta im točno treba, ali najčešće podižu nenamjenski kredit za putovanja ili hitne popravke na kući. Još kratko vrijeme imamo ponudu za nenamjenski kredit koji možemo izdati u roku od jednog dana. Može se podići u iznosu od 1000 pa do 30.000 eura”, rekla je Tihana Mamić iz Sberbanka.