Ruski investitor napušta Dubrovnik, traži kupca za hotel

Nakon što osam godina nije uspio na mjestu ratom uništenog hotela Belvedere realizovati novu investiciju čini se da se ruski milijarder Viktor Vekselberg malo umorio te da bi Belvedere mogao prodati nekom novom investitoru, piše Dubrovački dnevnik.

Ovih dana investitori iz SAD-a posjetili su gradonačelnika Dubrovnika Mata Frankovića jer su zainteresovani da u Dubrovniku otvore hotel s pet zvjezdica, dodaje Dubrovački a prenosi Poslovni dnevnik.

Novi investitor bi trebalo da obnovi stari Belvedere, kompleks za koji je Vekselberg imao planove rušenja kako bi na njegovom mjestu sagradio novi, luksuzniji hotel po idejnom rješenju arhitektonske agencije 3LHD-a.

Kako je za Jutarnji list izjavio gradonačelnik Mato Franković, njega je u četvrtak posjetila delegacija renomiranog američkog hotelskog lanca.

“Oni su stigli s vizualima rekonstrukcije i studijama, ali prvo su željeli da vide kako projekat stoji prostorno-planski, odnosno provjere šta se sve unutar tog područja može raditi. Zainteresovani su za rekonstrukciju postojećeg projekta, u postojećim gabaritima, a prednost je to što za projekat postoje i građevinska te upotrebna dozvola, dok bi investitori trebalo da obezbijede dozvolu za rekonstrukciju’, rekao je Franković i dodao da vjeruje da je obnova Belvederea realna.